11:03:46 AM 

 RojavaNews: Grûpên çekdar yên li Efrînê berdewam in bi guhartina navên rê, meydan û bazarên Efrînê. Îro navê Serokê Tirkiyê Recep Teyip Erdogan li meydaneke Efrînê kirin.

Jêderekê  ji  bajarê Efrînê ji RojavaNews re ragihandin ku , duh Çarşemê, grûpên çekdar navê meydana Seray ya Efrînê guhartin û kirin “Meydana Recep Teyip Eredogan”

Heman jêderê ragihand, ku çend rojên bihûrî,  grûpên çekdar navên rê, kolan  û bazarên Efrînê diguhêrin, ku navê çariyana Newroz kirine “Selahedîn el-Eyûbî” û navê çariyana Kawa jî bi “Xusin Zeytûn” û  çariyana “Wetenî” bi “Çariyana Şuheda” guhartine.

Ev proseya guhartina navên rê, kolan û meydanên Efrînê ji aliyê artêşa Tirkiyê û grûpên çekdar ve, ji aliyê welatiyên Efrînê ve li ser tûra civakî rastî nerazîbûneke tund tê û bûye cihê şermezariyê.

Tê zanîn ku Artêşa Tirkiyê û grûpên çekdar ji roja 18ê Adara bihûrî ve Herêma Efrînê kontrol kirine û ta niha ji bilî dizî û talankirina malên Kurdan û revandina xelkê Efrînê, bi hezaran koçberên Ereb ên ji navçeyên cuda ên Sûriyê li mal û milkên Efrîniyan tên bicihkirin piştî ew mal hatin talankirin û bi taybet gundên li ser sînor.