12:51:54

Rojava News: Li ser daxwaza malbatên girtiyan û Emîndariya Giştî ya Encûmena Niştimanî ya Kurd li Sûriye (ENKS), greva birçîbûnê ya li Rojavayê Kurditanê bidawî bû.

Emîdariya Giştî ya ENKSê îro li bajarê Qamişlo konferanseke rojnamevanî lidar xist, tê de hat ragihandin ku, li ser daxwaza malbatên girtiyan îro li hemû bajar û bajarokê Kurdistana Sûriyê dawî li çalakiya greva birçîbûnê tê.

endamê Emîdariya Giştî ya ENKSê Mihsin Tahir di konferansê de got. “Em wek ENKSê dawî li çalakiya greva birçîbûnê tînin, lê em çalakiyên xwe yên aştiyane berdewam dikin, heta girtiyên me ji girtîgehên PYDê de serbest tên berdan.”

Herwiha Serokê Xwecihiya Rojhilatê Qamişlo Şemdîn Nebî ku bi xwe yek ji grevgirtiyan bû, spasiya rojnamevan û desgehên ragihandinê kir, ku rewşa çalakiya greva birçîbûnê dişopandin. Herwiha got ku, ew biryara Emîndariya Giştî ya ENKSê li ser xwe qebûl dikin û daxwaz kir ku girtiyên ENKSê ji zîdanan serbest bêne berdan. 

Bo şermezarkirina girtina siyasetmendaran ji aliyê Asayişa Rojavayê Kurdistanê, ji roja yekem ya cejna Qurbanê 12 Îlonê Xwecihiya Rojhilatê Qamişlo ya ENKSê dest bi greveke birçîbûnê kiribû, îro jî di roja heftem de jî dawî li greva xwe anî.